കരുണാകരനേക്കാൾ വലിയ ക്രൂരത അരങ്ങേറിയിട്ടും മുഖ്യമന്ത്രി വിജയൻ ക്രൂരനാകാതിരിക്കുന്നത് എന്തുകൊണ്ടാണ് ?

ഇതുസംബന്ധിച്ചും അനേകം സിനിമകളും കഥകളും ആവർത്തിച്ചു നമ്മെ ഓർമ്മിപ്പിച്ചുകൊണ്ടിരിക്കുന്നു. രാജന്റെ ശവശരീരംപോലും ഇന്നുമെവിടെയെന്ന് ആർക്കുമറിയാതെ പോയ ഭീകരതക്ക് കാരണക്കാരനാണ് കരുണാകരൻ. ഇന്നത്തെ മുഖ്യമന്ത്രിയായ വ്യക്തിയെ വരെ അക്കാലത്ത് ലോക്കപ്പ് മർദ്ദനത്തിന് വിധേയനാക്കി. ചോരപുരണ്ട വസ്ത്രങ്ങളുമായി അന്നത്തെ എം.എൽ.എ വിജയൻ നിയമസഭയിൽ പൊട്ടിത്തെറിച്ചു.

കരുണാകരൻ ചരിത്രത്തിൽ ക്രൂരനായ ഭരണാധികാരിതന്നെയെന്ന് സംശയമില്ല. ചെഗുവേരമുതൽ ഇങ്ങ് രാജൻവരെ; ഭരണകൂടം ശവശരീരത്തെ പോലും ഭയപ്പെടുന്നു. സ്ഥിതിഗതികൾക്ക് എന്ത് മാറ്റമാണ് കേരള രാഷ്ട്രീയത്തിൽ ഉണ്ടായിരിക്കുന്നതെന്ന് പറയണം ആരെങ്കിലും.

ഏഴു വർഗ്ഗീസുമാരാണ് ഈ ഭരണകാലയളവിൽ ഭരണകൂട ഭീകരതക്കിരയായി കൊല്ലപ്പെട്ടത്. ഇരുപത്തിയൊന്നുപേർ ലോക്കപ്പ് മർദ്ദനങ്ങൾക്കു വിധേയരായി കൊലചെയ്യപ്പെട്ടു. കരുണാകരനേക്കാൾ വലിയ ക്രൂരത അരങ്ങേറിയിട്ടും മുഖ്യമന്ത്രി വിജയൻ ക്രൂരനാകാതിരിക്കുന്നത് എന്തുകൊണ്ടാണ് ?

കണ്ണുകൾ ചൂഴ്ന്നെടുക്കപ്പെടുകയാണ്. അടിയന്തിരാവസ്ഥ അവസാനിച്ച് നാൽപതു കൊല്ലങ്ങൾക്കിപ്പുറവും അനേകം ഈച്ചരവാര്യർമാരുടെ കണ്ണുനീരു നമ്മൾ കാണാതെ പോകുന്നത് എന്തുകൊണ്ടാണ്? രാജന്റെ ശവശരീരത്തിനോട്,വർഗീസിന്റെ ശവശരീരത്തിനോട് കാണിച്ച അതേ ക്രൂരതയാണ് ഇന്നും കേരളാപ്പോലീസ് തുടരുന്നത്. അവരുടെകണ്ണുകള് ചൂഴ്ന്നെടുക്കപ്പെട്ടിരിക്കുന്നു.

മഞ്ചക്കട്ടി ഊരിൽ പോലീസ് വ്യാജ ഏറ്റുമുട്ടലിൽ കൊലപ്പെടുത്തിയ കാർത്തിക് എന്ന കണ്ണന്റെ കണ്ണുകൾ രണ്ടും നഷ്ടപ്പെട്ട് പുഴുവരിച്ച അവസ്ഥയിൽ ആകാൻ ആരാണ് കാരണക്കാർ ? “മരണത്തിനു മുൻപോ മരണം കഴിഞ്ഞയുടനെയോ സഖാവിന്റെ കാലുകൾ തമ്മിൽ കൂട്ടിക്കെട്ടിയിട്ടുണ്ടായിരിക്കാം….. വെറും ഒന്നര ദിവസത്തിനുള്ളിൽ മൃതദേഹം ഈ അവസ്ഥയിൽ എത്തുമോ?

സ്വന്തം മകന്റെ അഴുകി വികൃതമായ ഈ ശരീരം കണ്ട് ഹൃദയം പൊട്ടി വിലപിച്ച ഒരു അമ്മയുടെ കണ്ണീരിന് കേരള ജനതയുടെ മന:സാക്ഷി മറുപടി നൽകേണ്ടതുണ്ട്.” ഷൈന പി.എ. ചോദിക്കുന്ന ചോദ്യങ്ങൾകേരളീയ സമൂഹം ചോദിക്കേണ്ടതുണ്ട്. “പത്തു വർഷത്തിനു ശേഷം ഈ തരത്തിൽ നിന്റെ ദേഹം കാണാനാണോ ഞാൻ ജീവിച്ചിരുന്ന” തെന്ന അമ്മയുടെ നോവുന്ന ചോദ്യവും ഉത്തരം തേടുന്നു.

എല്ലാവരും മൗനത്തിലാണ്. ബാബരി മസ്ജിദ് കാര്യത്തിലും ശബരിമലയുടെ കാര്യത്തിലും. എല്ലാമെല്ലാം……. ഭീതിപ്പെടുത്തുന്ന മൗനങ്ങളാൽ മുദ്രിതമാക്കപ്പെട്ടിരിക്കുകയാണ് അന്തരീക്ഷം. ഫാസിസത്തെ ചരിത്രത്തിൽ വല്ലപ്പോഴും മാത്രം സംഭവിക്കുന്ന ഒരു അപഭ്രംശമായി കാണുന്നതിനുപകരം എപ്പോഴും നമ്മോടൊപ്പമുള്ള ഒന്നായി ജനാധിപത്യത്തിലും ലിബറൽ – ഇടതുപക്ഷ വിശ്വാസികളിലുമെല്ലാം അന്തർലീനമായി വർത്തിക്കുന്ന അധികാരക്കൊതിയുടെ പ്രത്യക്ഷീകരണമായി തിരിച്ചറിയുന്പോഴേ അതിന്റെ അന്തർധാരകൾ നേരാംവണ്ണംചുരുളഴിയുകയുള്ളൂ.

ജനങ്ങളുടെ താത്പര്യത്തിന് വിരുദ്ധമായി വരുന്ന സർവാധിപത്യ ഭരണകൂടത്തെ തൂത്തെറിയൽ എളുപ്പമാണ്. എന്നാൽ ജനങ്ങളുടെ സജീവ പങ്കാളിത്തത്തോടെ സംജാതമാകുന്ന ഫാസിസമാണ് അപകടകരം.