Blive News
ചില ശല്യക്കാരിൽ നിന്നും ഒഴിഞ്ഞു മാറുന്നത് മനുഷ്യസഹജമാണ്. മനുഷ്യന് നിരന്തരം ബുദ്ധിമുട്ടുകൾ സൃഷ്ടിക്കുന്ന കൊതുകുകൾക്കും ( mosquitoes ) ഇത്തരത്തിൽ അപ്രിയരെ ഒഴിവാക്കുവാനുള്ള തിരിച്ചറിവുണ്ടാകുമെന്ന കണ്ടെത്തലിലാണ് ശാസ്ത്രം ഏറ്റവുമൊടുവിൽ ചുവടുറപ്പിച്ചിരിക്കുന്നത്.
ജീവശാസ്ത്ര പഠനങ്ങൾ പ്രസിദ്ധീകരിക്കുന്ന കറന്റ് ബയോളജിയിലൂടെ കൗതുകകരമായ പഠന ഫലം പുറത്തു വന്നു. ചില മനുഷ്യർക്ക് മേൽ കൊതുകുകൾക്ക് കൂടുതൽ താത്പര്യമുണ്ടാകുമെന്ന് വളരെ മുൻപ് തന്നെ ശാസ്ത്ര പരീക്ഷണങ്ങളാൽ തെളിയിക്കപ്പെട്ടതാണ്.
എന്നാൽ മനുഷ്യർ തങ്ങളുടെ കൈകളാൽ കൊതുകുകൾക്ക് നേരെ ശക്തമായ പ്രഹരം തുടരുന്നത് അവയ്ക്ക് കൂടുതൽ നീരസം സൃഷ്ടിക്കപ്പെടുമെന്നാണ് ഗവേഷകർ വിലയിരുത്തുന്നത്.
കൊതുകുകൾ ഒരിക്കൽ അപകടകരമായ ഒരു ഗന്ധം തിരിച്ചറിഞ്ഞ് കഴിഞ്ഞാൽ അവയെ പ്രതിരോധിക്കുന്നതിനു വേണ്ടി വ്യാപകമായി ഉപയോഗപ്പെടുത്തുന്ന ഡീറ്റിനു സമാനമായ അസ്വസ്ഥകൾ ആ ഗന്ധം സൃഷ്ടിക്കുമെന്ന് സിയാറ്റിൽ വാഷിംഗ്‌ടൺ യൂണിവേഴ്സിറ്റിയിലെ ജെഫ്രി റൈഫിൾ വിശദീകരിച്ചു. ദിവസങ്ങളോളം തിരിച്ചറിഞ്ഞ ഗന്ധം ഓർത്തിരിക്കുവാനുള്ള കഴിവും കൊതുകുകൾക്കുണ്ടെന്ന് അദ്ദേഹം പറയുന്നു.
ആക്രമിക്കുന്നതിനുള്ള കൊതുകുകളുടെ തിരഞ്ഞെടുപ്പിനെ ഈ തിരിച്ചറിവ് എങ്ങനെ സ്വാധീനിക്കുന്നു എന്നറിയുന്നതിനായി റൈഫില്ലും സഹപ്രവർത്തകരും ചേർന്ന് ഡെങ്കിപ്പനി, ചിക്കുൻഗുനിയ, സിക, മഞ്ഞപിത്തം എന്നീ രോഗങ്ങൾ പരത്തുന്ന ഈഡിസ് ഈജിപ്തിഎന്ന വിരുതനിൽ കുറച്ചധികം പരീക്ഷണങ്ങൾ നടത്തുകയുണ്ടായി.
ഒരു ഗന്ധവും അതുമായി ബന്ധപ്പെട്ട യാന്ത്രിക സമാനമായ പ്രവർത്തനവും മനസ്സിലാക്കുവാൻ ഈ പ്രാണികൾക്ക് ദ്രുത ഗതിയിൽ സാധിക്കുമെന്നും അത് സഞ്ചരിക്കേണ്ട ദിശ തിരഞ്ഞെടുക്കുവാൻ സഹായകമാകുന്നുവെന്നും അവർ കണ്ടെത്തി.
ഗന്ധവുമായി ബന്ധപ്പെട്ടിരിക്കുന്ന പ്രവർത്തനത്തിനായി ഒരു യന്ത്രോപകരണമാണ് ഗവേഷകർ ഉപയോഗപ്പെടുത്തിയത്. സ്പർശിക്കുന്നതിന് മുൻപ് വായുവിലെ ചെറിയ ചലനം പോലും അവയെ അസ്വസ്ഥമാക്കുന്നതായും കണ്ടെത്തിയിരുന്നു.
പുതിയ പഠനത്തിന്റെ ഭാഗമായുള്ള കണ്ടെത്തലുകൾ കൊതുക് നിയന്ത്രണത്തിനും അവ മൂലമുണ്ടാകുന്ന പകർച്ച വ്യാധികൾ തടയുന്നതിനും വലിയ രീതിയിൽ പ്രയോജനകരമാകുമെന്ന് വാഷിംഗ്‌ടൺ യൂണിവേഴ്സിറ്റി വിലയിരുത്തുന്നു.
കൊതുകുകളുടെ പെരുമാറ്റ രീതികളെ പറ്റിയും അവയുടെ ജനിതക ഘടനകളെ പറ്റിയും കൂടുതൽ തിരിച്ചറിഞ്ഞാൽ അവ പരത്തുന്ന രോഗങ്ങൾ പ്രതിരോധിക്കുന്നതിൽ കൂടുതൽ വിജയം നേടാൻ കഴിയുമെന്നാണ് ശാസ്ത്രലോകം പ്രത്യാശിക്കുന്നത്.
സ്വസ്ഥമായ നിദ്ര ആഗ്രഹിക്കാത്ത മനുഷ്യരുണ്ടാകില്ല. രോഗ വ്യാപികളായ കൊതുകുകളെ നിയന്ത്രിച്ച് നിദ്രാവിഹീനർക്ക് ആശ്വാസം പകരുന്ന മാർഗ്ഗങ്ങളിലേക്ക് വീണ്ടും ഉറ്റുനോക്കുകയാണ് ശാസ്ത്ര ലോകം.
കടപ്പാട്: ട്രീഹഗ്ഗർ.കോം
