Movie prime

ഓൺലൈൻ ബാങ്കിങ് കുതിക്കുന്നു; ഒപ്പം തട്ടിപ്പു ശ്രമങ്ങളും 

 

ഇന്ത്യയില്‍ ഓണ്‍ലൈന്‍ ബാങ്കിങിലേക്കും മറ്റു സാമ്പത്തിക ഇടപാടുകളിലേക്കും കടക്കുന്ന ഉപഭോക്താക്കളുടെ എണ്ണം ഉയരുന്നതനുസരിച്ച് തട്ടിപ്പുകള്‍ക്കുള്ള ശ്രമങ്ങളും വര്‍ധിക്കുന്നതായി കണ്ടെത്തൽ. 

ട്രാന്‍സ് യൂണിയൻ പുറത്തു വിട്ട പുതിയ ഗവേഷണ റിപോര്‍ട്ടിലാണ് തട്ടിപ്പുകള്‍ക്കുള്ള ശ്രമങ്ങളും കൂടിവരുന്നതായി കണ്ടെത്തിയിരിക്കുന്നത്.  2020 സെപ്റ്റംബര്‍ ഒന്നു മുതല്‍ ഡിസംബര്‍ 31 വരെയുള്ള നാലു മാസങ്ങളെ അപേക്ഷിച്ച് 2021 ജനുവരി ഒന്നു മുതല്‍ മെയ് ഒന്നു വരെയുള്ള നാലു മാസകാലത്ത് ഇന്ത്യയില്‍ നിന്നുള്ള സാമ്പത്തിക സേവന ബിസിനസുകളില്‍ ഡിജിറ്റല്‍ തട്ടിപ്പു ശ്രമങ്ങള്‍ എന്നു സംശയിക്കപ്പെടുന്നവയുടെ കാര്യത്തില്‍ 89 ശതമാനം വര്‍ധനവുണ്ടായി. ആഗോള തലത്തില്‍ സാമ്പത്തിക സേവന തട്ടിപ്പു ശ്രമങ്ങളില്‍ 149 ശതമാനം  വര്‍ധനവാണുണ്ടായത്.

ആഗോള തലത്തില്‍ 40,000 വെബ്സൈറ്റുകളിലും ആപ്പുകളിലും  നടന്ന കോടിക്കണക്കിന് ഇടപാടുകളില്‍ നടത്തിയ വിശകലനത്തെ തുടര്‍ന്നാണ് ട്രാന്‍സ് യൂണിയന്‍ ഈ നിഗമനത്തിലെത്തിയത്. ഇന്ത്യയടക്കം ലോകത്തിന്റെ വിവിധ ഭാഗങ്ങളില്‍ നിന്നുള്ള ട്രാഫിക്കാണ് ഈ വെബ് സൈറ്റുകളിലേക്കും ആപ്പുകളിലേക്കും എത്തുന്നത്.

ആഗോള വ്യാപകമായി ഡിജിറ്റല്‍ തട്ടിപ്പു ശ്രമങ്ങള്‍ ഉയരുകയാണെന്ന് ഇതേക്കുറിച്ചു പ്രതികരിച്ച ട്രാന്‍സ് യൂണിയന്‍ ഇന്ത്യയുടെ എക്സിക്യൂട്ടീവ് വൈസ് പ്രസിഡന്റും തട്ടിപ്പുകള്‍ തടയുന്നതിനുള്ള വിഭാഗത്തിന്റെ മേധാവിയുമായ ഷലീന്‍ ശ്രീവാസ്തവ പറഞ്ഞു.  ഉയര്‍ന്ന മൂല്യമുളള ഇടപാടുകള്‍ കൂടുതലും നടക്കുന്നതിനാല്‍ സാമ്പത്തിക സേവന രംഗത്താണ് തട്ടിപ്പുകള്‍ക്കുള്ള  കൂടുതല്‍ ശ്രമങ്ങള്‍ നടക്കുന്നതെന്നും അദ്ദേഹം കൂട്ടിച്ചേര്‍ത്തു.

ഇന്ത്യയിലെ ടെലികോം രംഗത്ത്  തട്ടിപ്പു സംശയിക്കുന്ന സംഭവങ്ങളുടെ കാര്യത്തില്‍ 18.54 ശതമാനവും യാത്രയുമായി ബന്ധപ്പെട്ട രംഗങ്ങളില്‍ 11.57 ശതമാനവും വര്‍ധനവാണുണ്ടായത്.  ഗെയിമിങുമായും ലോജിസ്റ്റിക്കുമായും ബന്ധപ്പെട്ട തട്ടിപ്പു ശ്രമങ്ങളെന്നു സംശയിക്കുന്നവയുടെ കാര്യത്തില്‍ കുറവുണ്ടായതായും റിപോര്‍ട്ട് സൂചിപ്പിക്കുന്നു.