in

കരള്‍ രോഗത്തിന് നൂതന ചികിത്സയുമായി തിരുവനന്തപുരം മെഡിക്കല്‍ കോളേജ് ആശുപത്രി

തിരുവനന്തപുരം: കരളിലെ ഉയര്‍ന്ന രക്തസമ്മര്‍ദ്ദം മൂലം അമാശയത്തിലെ രക്തക്കുഴലുകള്‍ വീങ്ങുന്ന രോഗത്തിന് മെഡിക്കല്‍ കോളേജ് ആശുപത്രിയില്‍ നൂതന ചികിത്സ. 

തിരുവനന്തപുരം സ്വദേശിയായ 49 വയസുകാരിയ്ക്കാണ് നൂതന ചികിത്സയിലൂടെ രോഗം ഭേദമാക്കിയത്. തുടര്‍ച്ചയായി രക്തം ഛര്‍ദിച്ചതിനെ തുടര്‍ന്ന് ആശുപത്രിയില്‍ ചികിത്സയിലായിരുന്ന രോഗിയെ വിശദമായ പരിശോധന നടത്തിയപ്പോഴാണ് വീങ്ങിയ രക്തക്കുഴലുകളും രക്തസ്രാവവും കണ്ടെത്തിയത്. 

തുടര്‍ന്ന് ശ്രീചിത്രയിലെ ഇന്‍റര്‍വെന്‍ഷണല്‍ റേഡിയോളജി വിഭാഗത്തിലെ ഡോക്ടര്‍മാരാണ് ശസ്ത്രക്രിയ കൂടാതെ ബലൂണ്‍ ഒക്ലൂഡഡ് റിട്രോഗ്രേഡ് ട്രാന്‍സ്വെനസ് ഒബ്ളിട്ടറേഷന്‍ അഥവാ ബി ആര്‍ ടി ഒ എന്ന ചികിത്സയിലൂടെ കഴുത്തിലെ രക്തക്കുഴല്‍ വഴി ഈ ഞരമ്പുകള്‍ കരിച്ചത്. ആദ്യമായാണ് ഇത്തരം ചികിത്സാമാര്‍ഗം സംസ്ഥാനത്തെ ഒരു സര്‍ക്കാര്‍ ആശുപത്രിയില്‍ നടക്കുന്നത്. 

ചെലവേറിയ ഈ ചികിത്സ ആരോഗ്യ ഇന്‍ഷുറന്‍സ് മുഖേന സൗജന്യമായാണ് രോഗിയ്ക്ക് നല്‍കിയത്. കരള്‍രോഗത്തിന് മറ്റൊരു നൂതന ചികിത്സാരീതിയായ ടിപ്പ്സും ശ്രീചിതാ ആശുപത്രിയുമായി സഹകരിച്ച് മുമ്പ് നടത്തിയിട്ടുണ്ടെന്ന് ഡോക്ടര്‍മാര്‍ അറിയിച്ചു. 

ഓപ്പണ്‍ സര്‍ജറിയുടെ അപകടസാധ്യത വളരെ കൂടുതലായ കരള്‍രോഗികള്‍ക്ക് ഇത്തരം ചികിത്സകള്‍ പ്രയോജനകരമാണ്. മെഡിക്കല്‍ കോളേജ് ആശുപത്രിയിലെ ഉദരരോഗ വിഭാഗം മേധാവി ഡോ കൃഷ്ണദാസ് ദേവദാസ്, ഡോ സന്ദേഷ്, ഡോ ഷാനിദ്, ശ്രീചിത്രയിലെ ഡോക്ടര്‍മാരായ ഡോ കേശവ്ദേവ്, ഡോ ജിനേഷ്, ഡോ അനൂപ്, ഡോ ജയദേവന്‍, ഡോ സന്തോഷ് എന്നിവരാണ് ചികിത്സയ്ക്ക് നേതൃത്വം നല്‍കിയത്.

Written by Blive News

Leave a Reply

Your email address will not be published. Required fields are marked *

തിരുവനന്തപുരം ജില്ല പൂര്‍ണമായും ഇ-ഹെല്‍ത്ത് സംവിധാനത്തിലേക്ക്  

സ്റ്റുഡന്‍റ് പോലീസ് കേഡറ്റുകള്‍ക്ക് മികച്ച വിജയം