വിമാനങ്ങളിൽ മിഡിൽ സീറ്റുകൾ ഒഴിച്ചിടാൻ നിർദേശം
വിമാന യാത്രയിൽ, മൂന്നു പേർക്കിരിക്കാവുന്ന സീറ്റുകളിൽ മധ്യത്തിലുള്ളത് ഒഴിച്ചിടാൻ ഡയറക്റ്റർ ജനറൽ ഓഫ് സിവിൽ ഏവിയേഷൻസിൻ്റെ നിർദേശം. മിഡിൽ സീറ്റുകൾ ഒഴിച്ചിടാൻ കഴിയാത്ത സാഹചര്യത്തിൽ യാത്രക്കാർക്ക് ശരീരം പൂർണമായും പൊതിഞ്ഞ് സംരക്ഷിക്കുന്ന തരത്തിലുള്ള റാപ്-എറൗണ്ട്-ഗൗണുകൾ നല്കണമെന്ന് പ്രത്യേകം നിഷ്കർഷിച്ചിട്ടുണ്ട്.
“കൊറോണ വൈറസിനെതിരെയുള്ള യുദ്ധത്തിൽ സാമൂഹ്യ അകലം പാലിക്കുക എന്ന നിർദേശത്തിന് വലിയ പ്രാധാന്യമുണ്ട്. മിഡിൽ സീറ്റുകൾ കഴിയാവുന്നിടത്തോളം ഒഴിച്ചിടണം. തിരക്കുള്ള സമയങ്ങളിൽ അതിന് കഴിയാതെ വന്നാൽ യാത്രക്കാർക്ക് റാപ്- എറൗണ്ട്-ഗൗണുകൾ നല്കണം” – ഡിജിസിഎ നിർദേശം പറയുന്നു.
ലോക്ഡൗൺ മൂലം രണ്ടു മാസക്കാലമായി നിർത്തിവെച്ചിരുന്ന വിമാന സർവീസുകൾ പുനരാരംഭിച്ച സാഹചര്യത്തിലാണ് നിർദേശം വന്നിരിക്കുന്നത്. നേരത്തേ, പ്രവാസികളെ തിരിച്ചെത്തിക്കുന്ന വിമാനങ്ങളിലെ മിഡിൽ സീറ്റുകൾ ഒഴിച്ചിടണം എന്ന് സുപ്രീം കോടതി അഭിപ്രായപ്പെട്ടിരുന്നു. ആ നിർദേശം നടപ്പിലായിരുന്നില്ല.
വിമാനക്കമ്പനികളുടെയും യാത്രക്കാരുടെയും താത്പര്യങ്ങൾ ഒരേപോലെ സംരക്ഷിക്കുന്ന തരത്തിലുള്ള നിർദേശമാണ് വ്യോമയാന മന്ത്രാലയം ഇപ്പോൾ നല്കിയിരിക്കുന്നത് എന്ന് വിലയിരുത്തപ്പെടുന്നു.
