മുപ്പതിലധികം ജനപ്രിയ ആപ്പുകൾ പ്ലേസ്റ്റോറിൽ നിന്ന് നീക്കം ചെയ്‌തു
ഫോട്ടോകളിൽ ബ്യൂട്ടി ഫിൽറ്റർ ചേർക്കുന്നവ ഉൾപ്പെടെ 30-ലധികം ജനപ്രിയ ആപ്ലിക്കേഷനുകൾ ഗൂഗ്ൾ പ്ലേ സ്റ്റോറിൽ നിന്ന് നീക്കംചെയ്തു.
പുതിയ ഉപയോക്താക്കൾക്ക് ഇവ പ്ലേസ്റ്റോറിൽ നിന്ന് ഡൗൺലോഡ് ചെയ്യാനാവില്ല. എന്നാൽ ഇതിനോടകം ഇവ ഡൗൺലോഡ് ചെയ്ത 20 ദശലക്ഷത്തിലേറെ ഉപയോക്താക്കൾ സുരക്ഷാ അപകടങ്ങൾ ഒഴിവാക്കാൻ ഫോണുകളിൽ നിന്ന് ഈ ആപ്ലിക്കേഷനുകൾ അൺഇൻസ്റ്റാൾ ചെയ്യണമെന്ന് ഗൂഗ്ൾ നിർദേശിച്ചിട്ടുണ്ട്.
സുരക്ഷാ ഗവേഷകരായ വൈറ്റ്ഓപ്സിൻ്റെ അഭിപ്രായമനുസരിച്ച്, അനാവശ്യ പരസ്യങ്ങളുപയോഗിച്ച് പ്രയാസങ്ങൾ സൃഷ്ടിക്കാനും ഒരു ലിങ്കിലും ക്ലിക്കുചെയ്യാതെ തന്നെ വെബ്സൈറ്റുകളിലേക്ക് റീഡയറക്ട് ചെയ്യാനും കഴിവുള്ള ആപ്ലിക്കേഷനുകളാണിവ. ചില സന്ദർഭങ്ങളിൽ, ഡൗൺലോഡ് ചെയ്തുകഴിഞ്ഞാൽ ഈ ആപ്ലിക്കേഷനുകൾ നീക്കം ചെയ്യുന്നതും ഉപയോക്താക്കൾക്ക് പ്രയാസകരമാണ്.
പ്ലേസ്റ്റോറിൽ നിന്ന് നീക്കംചെയ്‌തതായി വൈറ്റ്ഓപ്‌സ് പ്രസിദ്ധീകരിച്ച ആപ്ലിക്കേഷനുകളിൽ ചിലത് താഴെ പറയുന്നവയാണ്.യോറിക്കോ ക്യാമറ, സോളു ക്യാമറ, ലൈറ്റ് ബ്യൂട്ടി ക്യാമറ, ബ്യൂട്ടി കൊളാഷ് ലൈറ്റ്, ബ്യൂട്ടി & ഫിൽട്ടർ ക്യാമറ, ഫോട്ടോ കൊളാഷ് & ബ്യൂട്ടി ക്യാമറ, ഗാറ്റി ബ്യൂട്ടി ക്യാമറ, കാർട്ടൂൺ ഫോട്ടോ ക്യാമറ, സെൽഫി ബ്യൂട്ടി, ബ്യൂട്ടി ആൻഡ് ഫോട്ടോ എഡിറ്റർ, മൂഡ് ഫോട്ടോ എഡിറ്റർ & ബ്യൂട്ടി ക്യാമറ, റോസ് ഫോട്ടോ എഡിറ്റർ & സെൽഫി ബ്യൂട്ടി ക്യാമറ, ഫണ്ണി സ്വീറ്റ് ബ്യൂട്ടി ക്യാമറ, ലിറ്റിൽ ബീ ബ്യൂട്ടി ക്യാമറ, ബ്യൂട്ടി ക്യാമറ & ഫോട്ടോ എഡിറ്റർ പ്രോ, ഗ്രാസ് ബ്യൂട്ടി ക്യാമറ, ഫ്ലോവർ ബ്യൂട്ടി ക്യാമറ, ബെസ്റ്റ് സെൽഫി ബ്യൂട്ടി ക്യാമറ, ഓറഞ്ച് ക്യാമറ, സണ്ണി ബ്യൂട്ടി ക്യാമറ.
ഇവയിൽ ഏതെങ്കിലും ആപ്ലിക്കേഷനുകൾ ഇൻസ്റ്റാൾ ചെയ്തിട്ടുണ്ടെങ്കിൽ അവ ഉടനടി നീക്കം ചെയ്യണമെന്നാണ് ഗൂഗ്ൾ പ്ലേസ്റ്റോറിൻ്റെ നിർദേശം.
